Tumuaki, Kura-ā-iwi, U4

Ko te reo pōwhiri tēnei o Te Kura ā-iwi o Whakatupuranga Rua Mano mō te tūranga tumuaki. Ka ārahi i te kura kia ū, kia tutuki i ngā mātāpono i whakatōngia, nō te kaupapa o Whakatupuranga Rua Mano. He mea ārahi te kura e te iwi, e te whānau . Ko ngā mātāpono tekau o te kura ka noho hei tūāpapa mō ngā mahi katoa. Ko tā te kura, he poipoi i ngā tamariki kia Māori te titiro ki te ao, kia whai i te ara ā Tāwhaki. Ko ngā āhuatanga o te tumuaki: Ka whakatauira i ngā mātāpono o te kura, i roto mai i te kura, i waho atu o te kura, ka mutu, i roto i ngā mahi katoa. He mātanga reo Māori e āhei ana ki te whakatakoto me te whakatinana i ngā rautaki hei whakawhanake i te kounga, i te matatau me te rere o te reo Māori puta noa i te kura. Tamariki mai, kaimahi mai, whānau mai. He māramatanga ki te mana o te whānau, e whai hua ai ngā tamariki i roto i ngā mahi katoa. He pūkenga rawa ki te whakarite rautaki e tutuki pai ai i ngā hiahia me ngā matea ako o ia tamaiti me tōna whānau. Ka mōhio ki ngā tātai kōrero o Whakatupuranga Rua Mano me Te Kotahitanga o ngā Iwi ki te Tonga - Te Āti Awa, Ngāti Raukawa te Au ki te Tonga, Ngāti Toa Rangatira. He kanohi kitea ia e ngā whānau o te kura, e te hapori, e ngā marae o Te Kotahitanga o ngā Iwi. He pūkenga ki te ārahi, ki te whakakotahi, ki te whakahihiko i te wairua o ngā kaiako me ngā kaimahi o te kura. He pūkenga whakahaere kura. Ko ngā mahi tahua, whakaū i nga kaupapa here, whakahaere rawa, hangarau matahiko me te whakatutuki i ngā rautaki.